वार्तापत्र....
सांगोल नगरपरिषद निवडणुकीमध्ये चिन्हवाटप पूर्ण होताच राजकीय समीकरणांचे काटेकोर विश्लेषण सुरू झाले आहे. प्रत्येक पॅनेलची ताकद, प्रत्येक उमेदवाराचे व्यक्तिमत्त्व आणि मतदारांची चाल-सगळेच आता स्पष्ट स्वरूपात पुढे येऊ लागले आहे. चिन्हवाटप म्हणजेच निवडणुकीचा खरा पहिला टर्निंग पॉइंट मानला जात असल्याने, सांगोलमध्येही वातावरण क्षणाक्षणाला बदलताना दिसत आहे.
शिवसेनेला धनुष्य-बाण हे मूळ व ओळखण्यास सोपे चिन्ह मिळाल्याने त्यांच्या पॅनेलला मोठा फायदा होईल,असे बोलले जात आहे. पक्षाची परंपरा आणि चिन्हाची ओळख मतदारांना सहज पटते, त्यामुळे शिवसेना उमेदवार आता आत्मविश्वासाने रिंगणात उतरणार हे स्पष्ट आहे. सर्वच जागांवर एकच चिन्ह देण्याचा निर्णय त्यांच्या संघटितपणाचे द्योतक ठरतो. त्यामुळे क्रॉसव्होटिंगचा धोका कमी झाला असून मतदारांत ‘शिवसेना एकसंध’ असा संदेश पोहोचला आहे.
तसेच, धनुष्य-बाणावर लढणार्या सर्व उमेदवारांची नावे जवळजवळ निश्चित झाल्याने त्यांच्या प्रचाराला वेग येणार आहे.
भाजपच्या गोटात मात्र वेगळीच चर्चा आहे. सच्चे कमळप्रेमी नक्की कुठे उभे राहतील? हा प्रश्न जोर धरतो आहे. सांगोल तालुका व शहरात भाजपची संघटनात्मक ताकद परंपरेने कमीच. त्यामुळे बाहेरून आलेल्या नेतृत्वावर अवलंबून राहणारा हा पक्ष, स्थानिक मतदारांशी नवे संवाद उभी करताना कशी ताकद दाखवेल, याकडे विशेष लक्ष आहे.
कमळ वस्त्र नेसलेल्या लाल बावटा शेकापकडे झुकणार्यांबद्दल कार्यकर्त्यांमध्ये नाराजी आणि संभ्रम, दोन्हीही दिसून येतो. त्यामुळे ‘निष्ठावंत भाजपप्रेमी नक्की किती?’ हा प्रश्न भाजपच्याच दालनात गुंजतो आहे.
नगराध्यक्ष पदासाठी भाजपकडून फक्त कमळ चिन्हावर लढण्याचा निर्णय मोठा धोरणात्मक बदल मानला जातो. पण पॅनेल नाही, फक्त नगराध्यक्ष पदावर कमळ-अशा परिस्थितीत पॅनेल चिन्ह मतदारांच्या मनात रुजवण्यासाठी प्रचंड मेहनत घ्यावी लागणार आहे. अल्पावधीत मतदारांपर्यंत चिन्हाची ओळख पोहचवणे हे आव्हानच ठरणार आहे.
दरम्यान, अपक्ष म्हणून स्वतःची स्वतंत्र ओळख जपणारा झपके गट कोणती अनपेक्षित पॉलिसी वापरणार, याबद्दल उत्सुकता शिगेला पोहोचली आहे. अपक्ष गटांचा अंतिम क्षणापर्यंतचा ‘सायलेंट’ मोड आणि अचानक बदलणारे राजकीय पट हे सांगोलच्या निवडणुकीत नवे नाहीत. त्यामुळे यंदाही त्यांच्याकडून काही वेगळा खेळ पाहायला मिळू शकतो, अशी चर्चा आहे.
यंदाच्या निवडणुकीतील सर्वात मोठे आव्हान म्हणजे वेळ-फक्त चार दिवसांचा प्रचार : 27 ते 30 नोव्हेंबर. एवढ्या कमी वेळात चिन्ह बिंबवणे, मतदारांशी प्रत्यक्ष संवाद साधणे आणि पॅनेलची ताकद दाखवणे-हे प्रत्येक गटासाठीच कठीण काम आहे.
काठावर असलेले मतदार, असंतुष्ट कार्यकर्ते, अपक्षांचे समीकरण, यामुळे निवडणूक अधिकच अनपेक्षित बनली आहे.
एकंदरित पाहता सांगोल नगरपरिषद निवडणूक आता खरी रंगतदार वळणावर आली आहे.चिन्हवाटपाने राजकीय नकाशा स्पष्ट झाला असला तरी निकाल कोणत्या दिशेने झेप घेईल-हे सांगणे अजूनही कठीण.
मतदारांचे लक्ष, चर्चा आणि उत्सुकता-सगळेच आता कमालीचे वाढले आहे. सांगोलची निवडणूक म्हणजे खरंच एक राजकीय थरारपटच!
